أنا

بلف على مدوناتكم بقالي كتير
اللي دمة خفيف واللي دمة تقيل
واللي جد واللي بيهيس
قلت هي جت عليا يعني اشمعنى انا؟
وقررت اني اتكتك بالكي بورد بتاعتي انا كمان .. واسمع صوت التكتكة
واهو شوية اهيس مع المهيسين .. وشوية ابوز مع المبوزين .. وشوية اتنرفز مع المتنرفزين
بس اعرفكم بنفسي
انا هبنولا .. لا مش الشغالة
مش رسميا
يعني مش ماضية عقد ولا باقبض مرتب من شغلي
انا باشتغل لله وللوطن
شغالة عند عيله كبيرة
اجيد اعمال المنزل والطهي ورعاية المسنين والاطفال
مقيمة وجاهزة للسفر في وقت
مسحوبة من قفايا على طول وقت ما يعوزوني يندهوني وفين ما يحطوني يلاقوني

بس انا مش جاهلة والا من انصاف المتعلمين
انا معايا درسات عليا قد الدنيا في تخصص علمي مكلكع
ومثقفة جدا لدرجة ان روائع الادب الروسي والنجليزي والفرنساوي خلصت عليها من وانا في ثانوي
تخيلوا بقى دلوقتي انا بقرا ايه ولمين
بقرا فريزيان معتبر لبن كامل الدسم


ليه هبنولا .. لاني انا هبلة .. وده شئ اكتشفته مؤخرا بعد فوات الاوان
هبلاااااااااااااااا فوق ما تتخيلو .. في كل قرار خدته .. في كل حاجة عملتها .. في تعاملاتي مع الناس اللي عرفتهم او اللي اضطريت اتعامل معاهم ..

مريضة بامراض كتير اهمها النوستالجيا والاجورافوبيا والسوشيال فوبيا .. وما يستجد

ايوه
انا من الفاشلين المحبطين المهمشين في الحياه
المستخبيين ورا اسم مستعار وشاشة كمبيوتر

بس مش عايزاكو تقلقوا خالص
انا مش هنكد عليكو ابدا
يعني .. بقدر الامكان
هتنبسطوا قوي لما تقرولي
برضة بقدر الامكان
زورونا تجدوا مايسركم
حلبة موجود شاي موجود كاكاو موجود سحلب موجود
واللي جعان ممكن اعملله سندوتش تصبيرة لحد ما اطفي عالاكل
والكوبايات كتير والطباق كتير والحلل اكتر
الحوض بتاعنا جاي بمواعينه
وانا نضيفة قوي وشاطرة جدا في غسيل الملاعين
اسيبكم دلوقتي عشان الحق اعلق عالرز وافصص التوم لتقلية الملوخية وانا باشوف الحلقة المعادة من لحظة وداع

فاصل ونواصل